मौन प्रतिक्षा !

जीवनका ती मोडहरु

जहाँ तिम्रा सुन्दर आँखाहरु भेटिन्छन्

जीवनका ती घुम्तिहरु

जहाँ तिम्रा मुस्कानहरु पोखिन्छन्

जीवनका ती बाङ्गाटिङ्गा गल्लिहरु

जहाँ तिम्रा पदचापहरु भेटिन्छन्

ती सवैलाइ नियाल्नु छ एकपटक !

 

जोखेर तिम्रा स्नेहरुको घनत्व

तौलेर तिम्रा करुणाहरुको गुरुत्व

नापेर तिम्रा व्यक्तित्वको विराटता

निशव्द हुनु छ एकपटक !

 

उदाउनु र अस्ताउनु भन्दा पर

स्वागत र विदाइ भन्दा पर

स्विकारोक्ति र अस्विकारोक्ति भन्दा पर

तिमीलाइ महशुस गर्नु छ एकपटक !

 

तिम्रा प्रत्येक वाणिमा

खोज्नु छ दर्शन

तिम्रा प्रत्येक वाक्यमा

खोज्नु छ जीवनको अर्थ

तिम्रा प्रत्येक हेराइमा

खोज्नु छ दृष्टिकोण एकपटक !

जूनेलि रातमा

खोज्नु छ आकाशमा

तिम्रा आकृति,

खोलाको किनारमा

खोज्नु छ वालुवामा

तिम्रा पदचापहरु,

खोज्नु छ समयका फेदमा

जम्मा भएका रिक्तताहरु

अनि भर्नु छ त्यसलाइ

तिमीले गुनगुनाएका ध्वनिहरुले एकपटक !