मेसी - एक जादुगर

मेरो मेसीसँगको पहिलो परिचय टेलिभिजनका पर्दामा भएको होइन । मैले पत्रिकाका खेलकुदका पानाहरूमा मेसीलाई पढे । उनी फिफा वर्ष खेलाडी भए र चर्चाको केन्द्रमा आफूलाई उभ्याए । उनको तुलना डिएगो म्याराडोनासँग भयो । उनको खेल्ने शैली पनि उनै म्याराडोनासँग तुलना हुन थाल्यो । मैले मेसीलाई पहिलो पटक खेलाडी भन्दा पनि एउटा सुन्दर मिथको रुपमा चिने ।

*** 

२०२२ को डिसेम्बरको एक साँझ कतारको लुसेल रङ्गशालामा मेसी र उनको टिम अर्जेन्टिना विश्व विजेता बन्यो । यो सँगै मेसीले जित्न बाँकी केही रहेन अब । फुटबल पारखीको मन पटक पटक जितेका उनै लियोनल मेसीले गोल्डेन बल पनि जिते र प्रतियोगिताको उत्कृष्ट खेलाडी बने । गोल्डेन बल त मेसीले २०१४ मा नै जितेका थिए । तर यसपालिको जितमा उनका आँखामा आँशु थिएन । यति कतै आँशु थियो भने त्यो हर्षको आँशु थियो ।

*** 

विश्वकप आयो । मेसीको टिम आयो । कोचको रुपमा म्याराडोना आए । 

पहिलो पटक स्कुलको साथीले म्याराडोनाको बारेमा रोचक कहानी भनेको थियो। उसले विश्वकपमा म्याराडोनाले हातले गोल गरेको कथा रोचक तरिकाले सुनायो । पछि थाहा पाए स्वयम् म्याराडोनाले ह्यान्ड अफ गड भनेको उक्त गोल १९८६को विश्वकपको रहेछ , इङ्ल्याण्ड  विरुद्धको ।

 दुबै हातमा घडि लगाउने कोच म्याराडोनाको बारेमा थुप्रै चर्चाहरू भए। क्रिष्टियानो रोनाल्डो र मेसीको तुलना गर्दै उनीहरूका जीवन गाथाहरू आए । वायुमण्डल पुरै विश्वकपले भरियो ।

विश्वकपको सुरुवातसँगै साथीको जन्मदिन आयो । सबै जना मिलेर फुटबल उपहार दियौँ । उपहार पाएको भोलिपल्ट देखि  उसले विद्यालयमा त्यही नयाँ फुटबल ल्याउन थाल्यो । त्यसपछि हामी त्यही फुटबलको पछि लाग्यौ । टेलिभिजनको स्क्रिनमा र स्कुलको चउर, जतासुकै फुटबल हुन थाल्यो ।

जर्मनीसँग ४-० ले हारे पछि मेसीको टिम घर फर्कियो । म्याराडोना निराश भए । मेसी निराश भए । हामी निराश भयौँ । यसरी २०१०को विश्वकप सकियो ।

***

२०१४ आयो । विश्वकप आयो । फाइनलमा अर्जेन्टिना पराजित भयो जर्मनीसँग । मेसीले गोल्डेन बल पाए । विश्वकप ट्रफीलाई नियालिरहेका मेसीको आँखामा आँशु थियो । मलाई निदा फाजिलको गजलको सम्झना हुन्छ , मेसीको त्यो क्षणको तस्विर हेर्दा । कसैको भाग्यमा पनि सबथोक लेखिएको हुन्न। कतै टेक्ने धर्ती हुन्न , कतै हेर्ने आकाश हुन्न ।

मेसी निराश भए । हामी निराश भयौँ । यसरी २०१४ को विश्वकप सकियो ।

***

२०१८ पनि आयो । यतिबेला सम्म मेसीले विश्वकप र कोपा कपको फाइनलमा पराजय भएर आफ्नो राष्ट्रलाई कुनै महत्वपुर्ण उपाधि जिताउन सकिरहेका थिएनन् । मेसीलाई मात्रै होइन , उनलाई मन पराउने हामी सबैलाई पनि यहि प्रश्नले घोचिरहेको हुन्थ्यो । यस विश्वकपमा प्रि-क्वाटरफाइनलमा फ्रान्ससँग पराजित हुन पुग्यो अर्जेन्टिना । यहि फ्रान्स विश्व विजेता पनि बन्यो ।

क्लबका लागि जित्न बाँकी केही थिएन मेसीका लागि । तर देशका लागि जित्न बाँकी धेर थोक थियो । यस  बिचमा कोपा कपको फाइनलमा पराजित भइरहेने अर्जेन्टिना । सन्यास लिएर पछि फिर्ता गरेका मेसी । फाइनलमा पराजित मेसीको आँशुले भरिएको अनुहार । उनका प्रशंसकले देख्न बाँकी कुनै उतारचढाव थिएन ।

*** 

मेसी ३५ वर्षका भइसकेका थिए । म्याराडोना महाप्रश्थानमा हिडिसकेका थिए । रङ्गशालामा मेसी र अर्जेन्टिनाला हौसला दिइरहेने म्याराडोनालाई क्यामेराले देखाउन नपाउने भयो २०२२को विश्वकपमा । समुह चरणको पहिलप खेलमा नै साउदि अरबसँग हार व्योहर्न पर्यो अर्जेन्टिनाले । 

तर सम्मालिदै खेल्यो । लाग्थ्यो मेसीलाई विश्वकप जिताउन उनका सहकर्मि उत्साहित छन् । त्यसतै भयो २०२२ को डिसेम्बरको एक साँझ । २०२२ को डिसेम्बरको एक साँझ कतारको लुसेल रङ्गशालामा मेसी र उनको टिम अर्जेन्टिना विश्व विजेता बन्यो । यो सँगै मेसीले जित्न बाँकी केही रहेन अब । रोमाञ्चक खेलमा पेनाल्टि सुट आउटमा अर्जेन्टिना विश्व विजेता बन्यो । मेसीले गोल्डेन बल पाए । मेसीले विश्वकप जिते ।

***

फ्रान्स र अर्जेन्टिनाको उक्त फाइनलमा फ्रान्सका खेलाडी केलियन एमबाप्पेले ह्याट्रिक गरे । २३ वर्षे एमबाप्पे उदाउँदो सुर्य हुन भने ३५ वर्षिय लियोनल मेसी अस्ताइरहेका सुर्य हुन् । भनिन्छ “उदाइरहेको सुर्यको रंग रातो हुन्छ । अस्ताइरहेको सुर्यको रंग पनि रातो हुन्छ । प्रतिभावान मानिसहरुका लागि उदाउनु र अस्ताउनु एउटै हो।” खेल जीवनका अन्तिम वर्षहरुमा पनि मेसीले गोल मात्रै होइन सुन्दर एशिस्ट पनि गरेका छन् । यस विश्वकपमा उनले ७ गोल तथा ३ एशिस्ट गरे । यसरी मेसीले आफ्नो खेल जिवनको अन्तिम अध्यायको  सुन्दर ढङ्गले लेखे। 

हाम्रो समयको फुटबलका सुन्दर हस्ताक्षर हुन मेसी। उनै मेसीको प्रेरणाले अर्जेन्टिना विश्व विजेता बनेको  छ । केबल उपाधीले मात्रै नायकलाइ महान बनाउदैन । तर यो युगकै सुन्दर खेलाडीलाई आज विश्वकप उपाधिले अझ सशक्त बनाएको छ ।

आज मेसी र उनको देशले उपाधि जित्दा म्याराडोना यो संसारमा छैनन् । सायद उनी भएको भए रङ्गशालामा खेल हेरिरहेका हुन्थे र  बारम्बार क्यामेराले उनलाई पनि देखाउँने थियो । अब उनै महान म्यारोडोनाको नामको लहर सँगै मेसीको पनि आउनेछ । एकपटक विपिले भनेका थिए, “ मानिसको सफलता उसका उपलब्धिबाट होइन उसका प्रयासहरुका घनत्वहरुबाट नापिनु पर्दछ ।” सायद पाँचौ प्रयासमा विश्वकप जित्न सफल मेसी उनका उपलब्धिबाट होइन उनका प्रयासबाट अझ सुन्दर देखिन्छन् । 

***